بهجت آباد خاطره سی

 

 بهجت آباد خاطره سی

اوستاد شهریار                

 

اولدوز ساياراق گؤزله ميشم هر گئجه ياری

 

گج گلمه ده دير يار ، يئنه اولموش گئجه ، ياری

 

گؤزلر آسيلی ، يوخ نه قارالتی ، نه ده بير سس

 

باتميش  قولاغيم  گؤر نه دؤشورمكده دی داری

 

بير قوش « آييغام ! »‌سويليه رك ، گاهدان اييلده ر

 

گاهدان  اونودا يئل دئيه لای ــ لای هوش آپاری

 

ياتميش هامی ، بير آللاه اوياقدير ، داها بير من

 

مندن آشاغی كيمسه يوخ ، اوندان دا  يوخاری

 

قورخوم بودی يار گلمه يه ، بيردن ياريلا صبح

 

باغريم  ياريلار ، صبحوم  آچيلما ، سنی تاری !

 

دان اولدوزی ايسته ر چيخا ، گؤز يالواری چيخما

 

او چيخماسادا ، اولدوزومون  يوخدی  چيخاری

 

گلمز ، تانيرام بختيمی ، ايندی آغارار صبح

 

قاش  بيله  آغارديقجا  ،  داها  باش  دا  آغاری

 

عشقين كی قراريندا وفا اولمياجاقميش

 

بيلمم  كی  طبيعت  نيه  قويموش بو قراری ؟

 

سانكی خوروزون سون بانی ، خنجر دی سوخولدی

 

سينه مده اؤرك واراسا ، كسيب قيردی داماری

 

ريشخندله قيرجاندی سحر ، سويله دی : دورما

 

جان قورخوسی وار عشقين ، اوتوزدون بو قوماری

 

اولدوم قره گون ، آيريلادی او ساری تئلدن

 

بونجا  قره  گونلردی  ايدن  رنگيمی  ساری

 

گؤز ياشلاری هر يئردن آخارسا ، منی توشلار

 

دريايه  باخار ،  بللی دی ، چايلارين  آخاری

 

از بس منی ياپراق كيمی هجرانلا سارالديب

 

باخسان اوزونه سانكی قيزيل گولدی قيزاردی

 

محراب شفقده ئوزومی سجده ده گؤردوم

 

قان ايچره غميم يوخ ، اوزوم اولسون سنه ساری

 

عشقی واريدی « شهريار » ين گللی ـ چيچكلی

 

افسوس ، قارا يل اسدی ، خزان اولدی بهاری

 

 

یار آغلادی

       

          يار آغلادى

   اوستاد هوشنگ جعفرى  

 

 

( اوستاد بو گوزل شعرينى اؤز ياشاييش يولداشينا دئييب دير )

 

***

 

يارين بويون قوجاقلاديم ، يار آغلادى من آغلاديم

 

ييغيشدى قونشولار بوتون ، جار آغلادى من آغلاديم

 

 

باشيندا قار قالان داغا ، دانيشديم آيريليق سؤزون

 

بير آه چئكيب باشينداكى ، قار آغلادى من آغلاديم

 

 

طاريمدا نار آغاجلارى منی گؤروب دانيشديلار

 

بويومو زيتون اوخشادى ، نار آغلادى من آغلاديم

 

 

ائله كی اسدی بير خزان ، تالاندى گوللريم منيم

 

خبر چاتينجا بولبوله ، خار آغلادی من آغلاديم

 

 

اوره ك سؤزون دئديم تارا ، سيملر اولدو پارا پارا

 

ياواش ياواش سيزيللادى ، تار آغلادى من آغلاديم

 

 

دئديم كی حق منيمكیدى باشيمی چئكديلر دارا

 

طناب كسنده بوينومو ، دار آغلادى من آغلاديم

 

 

« جعفرى » يم ؛ بويوم بالا ، غم سينه مده قالا قالا

 

يار جانيمی آلا آلا ، يار آغلادی من آغلاديم

 

دلى دومرول

 

« دده قورقود » دان « دلى دومرول» ناغيلى

 

 « اوغوز قوجا » نين بير اوغلو واريدى ، آدى « دلى دومرول » يدى بير قوروچايين اوستونه كورپو تيكيب كورپونون اوستوندن گئچئندن اوتوز اوچ آقجا يانيندا داياناندان قيرخ آخجا باج آلاردى دئييردى : ايستيره م گورم دونيادا مندن گوجلو ايگيد تاپيلارمى ؟ يوخسا يوخ . بير گون گوردى نئچه نفر شيون ائديب آغلاييرلار ، علتين سوروشدو ، دئديلر عزرائيل اونلارين بير جاوانين اؤلدوروب . دئدى اگر عزرائيل باشارا بولور گلسين بئلين بوكوم بير يوموروق دا اونو آرادان آپاريم . داها خلق لره دولاشماسين . عزرائيل جناب لارى اونون كوكسينه قونوب بويوروب اونون جانين آلماقا گليب . دومرول عزرائيله يالواريب دئدى : منى اؤلدورمه بلكه قوجا آتامى كى دونيالار ساويبدير دونيادان آپار . عزرائيل « دومرول » ينن باهم اونون آتاسينين يانينه گئديب . آتاسى جواب وئريب هر نه ايستيرسن ايسته آنجاق جان وئر بيلمه ره م . « دومرول » قارا بير چكلى آناسينا اوز ساليب آناسيده چوخ ناراحت اولار كن « دومرول » ا ، آنلاديب كى جان دان پاى اولماز ، يوخسا هر نه جاندان اوزگه ايسته سه وئرسين . « دومرول » قادينين يانينه گئديب او دئييب : جناب عزرائيل منيم ايكى اوشاقيم وار گل منيم جانيمى آل تا اوشاقلاريم اوكسور ( يتيم ) قالماسين . آلاهين خوشو گليب « دومرول »‌‌ و قادينيه يوز قيرخ ايل عومور وئريب . آتاسى و آناسى نين جانين آليب .

دده قورقود گليب سوز قوشوب بوى ( ناغيل ) يازيب .