یاساق
طالعیمه سن باخ !
دوشونجه لریم یاساق
دویغولاریم یاساق
کئچمیشدن سؤز آچماغیم یاساق
گله جکدن دانیشماغیم یاساق
آتا - بابامین آدین چکمه ییم یاساق
آنامدان آد آپارماغیم یاساق !
… بیلیرسین ؟
آنامدان دوغولاندان بئله
اؤزوم بیلمه یه - بیلمه یه
دیل آچیب دانیشدیغیم دیلده
دانیشماغیمدا یاساق ایمیش ، یاساق
تورکون دیلی
اوستاد شهریار
ئوزگه دیله قاتسان، بواصیل دیل،اصیل اولماز
ئوز شعرینی فارسا - عربه قاتماسا شاعر
شعری اوخویانلار ، ائشیدنلر کسیل اولماز
فارس شاعری چوخ سؤزلرینی بیزدن آپارمیش
« صابر» کیمی بیر سفره لی شاعر ، پخیل اولماز
تورکون مثلی ، فولکلوری دنیا دا تک دیر
خان یورقانی ، کند ایچره مثل دیر ، میتیل اولماز
آذر قوشونی ، قیصر رومی اسیر ائتمیش
کسری سؤزودیر بیر بئله تاریخ ناغیل اولماز
پیشمیش کیمی ، شعرین ده گر ک داد- دوزی اولسون
کند اهلی بیلرلر کی دوشابسیز خشیل اولماز
سرزلرده جواهر کیمی دیر ، اصلی بدلدن
تشخیص وئرن اولسا بوقده ر زیر- زیبیل اولماز
شاعر اولا بیلمزسن ، آنان دوغماسا شاعر
مس سن ، آبالام ،هر ساری کؤینک قیزیل اولماز
چوخ قیسا بوی اولسان اولیسان جن کیمی شیطان
چوق دا اوزون اولما که اوزوندا عقیل اولماز
مندن ده نه ظالم چیخار، اوغلوم ، نه قصاص چی
بیر دفعه بونی قان کی ایپکدن قیزیل اولماز
آزاد قوی اوغول عشقی طبیعتده بولونسون
داغ - داشدا دوغولموش ده لی جیران حمیل اولماز
انسان اودی دوتسون بو ذلیل خلقین الیندن
آللاهی سؤرسن ، بئله انسان ذلیل اولماز
چوق داکی سرابون سویی وار یاغ - بالی واردیر
باش عرشه ده چاتدیرسا ، سراب اردبیل اولماز
ملت غمی اولسا ، بو جوجوقلار چؤپه دونمز*
اربابلار یمیزدان دا قارینلار طبیل اولماز
دوز واختا دولار تاختا - طاباق ادویه ایله
اوندا کی ننه م سانجیلانار زنجفیل اولماز
بو « شهریار» ین طبعی کیمی چیممه لی چشمه
کوثر اولا بیلسه دئمیرم ، سلسبیل اولماز
شهریار 1348
*اصلینده : بیر ذره مساوات اولا ، شاعر چپه دنمز